打針-->發燒-->氣管炎-->入醫院

大爺上次受左一刀之後, 都未好返晒

今次又再受苦喇!! 真係陰功~~

一波未平一波又起, 唉!!


25 JUL 開始有幾聲咳

諗住都唔係大問題, 會慢慢好返, 所以無俾藥佢食

始終初生既BB唔好食咁多藥



26 JUL 今日大爺咳得勁左

下午去健康院打四個月既針, 每邊大脾一支

姑娘都聽到大爺有幾聲咳, 不過照俾大爺打針, 佢話如果發燒就一定唔打得

大爺每支都喊左兩下就收聲

因為佢喊左兩下就啜手指黎安撫自己..哈哈!!

呢兩支針可能會發燒


半夜我起身望下大爺, 摸下佢額頭仔, 好慶

即刻幫佢探下熱, 38.6度, 發燒

即叫醒佢餵佢食退燒藥, 再貼退熱貼



燒到眼都腫腫地

但佢又無瞓返, 係咁食手指, 應該肚餓

所以餵左支奶俾佢...點知飲完後狂咳, 勁多痰, 勁到好辛苦嗌左幾下,

最後仲咳到嘔晒成支奶出黎

我就好呢HEA咁又幫佢抹身, 又幫佢換衫 ((阿比瞓到死豬無醒過))

好彩換完衫放佢落床拍拍下就瞓返!!


27 JUL  爸爸話佢成日咳到透唔到氣咁

仲嘔左3次奶 (大爺平時激少嘔奶)

所以覺得唔對勁, 都係帶佢去睇醫生

等睇醫生大爺己經攰到瞓著左!!



醫生話大爺氣管炎, 呼吸好束, 啲痰己經落左小支氣管度

俾左啲擴張氣管既氣大爺聞, 但都無好到

醫生就寫左封轉介信去威爾斯急症

佢話最好留院觀察, 驚大爺夜瞓覺咳咳下懶得咳, 俾啲痰卡住, 透唔到氣


夜晚經過家庭會議之後都係睇定啲先, 無去威爾斯

呢晚大爺食完藥, 沖埋涼就攰到瞓左

平時沖完涼後會好精神, 不停轉黎轉去

呢晚都未幫大爺抹身己經瞓到咁


點搞佢都唔醒, 著好晒衫都仲係瞓緊

真係陰功!!!



成晚我就間唔中起身望下佢,

好彩既係佢仲瞓得好, 無咳醒!!!


28 JUL 星期六, 下午放工食埋野就帶大爺去威爾斯

係爸爸度湊大爺返屋企, 大爺己經攰到同佢玩都無反應 

就咁就o係bb車度瞓左, 仲要瞓到好衰下..=.=!!




諗住去急症會等好耐, 點知好快就嗌我地名

再望下張咭, 原來大爺屬於緊急!!唔怪之咁快..

醫生都建議大爺最好入院觀察下

叫我地出去等等, 好快安排我地上病房

又真係好快, 好快有人帶我地上左去



大爺細細個要住醫院真係陰功豬囉!!!



一間房有兩張床, 好好彩大爺隔離床未有人入黎..

大爺呢個名無改錯, 入左醫院都有大爺既風範



醫生建議大爺住一, 兩晚

因為阿比第二日要返工, 所以今晚陪大爺呢個重任就交俾我喇!



我返屋企食個晚飯沖埋涼就返返去接更

返到佢見大爺駁左機!!嚇死我, 原來大爺頭先咳左成十分鐘

所以姑娘駁機CHECK住佢心跳同含氧量

夜晚九點後只可以一個家人陪, 所以阿比都要走LU.


我餵大爺食完奶奶就暗佢瞓!!



原來醫院會有埋奶提供, 仲要有大爺飲開個隻思敏兒, 非常之好啊!!

不過硬係唔同味咁, 聞落似麥精味


夜晚本來大爺好地地瞓, 諗住佢一覺瞓到大天光

點知, 隔離床十二點度入左個BB

佢阿媽不停出出入入, 大大聲聲嘭門同開櫃桶

搞到大爺喊醒左幾次, 真係想XYZ%.#佢..

終於佢四點幾同個工人帶埋BB偷走出院((聽到佢話去法國醫院))

我同大爺終於有返個清靜既環境瞓覺



其實我成晚都瞓唔到, 因為實在實在太凍

係超級凍!!!!我己經著左件外套都仲係好凍



七點幾有醫生黎, 話大爺可以回家渡假一晚, 叫我等多個醫生黎先

點知等下等下成十一點先黎

終於十二點可以同大爺返屋企喇!!


腳帶仲未剪, 第二朝返去覆多次診可以真正出院先剪



今日大爺精神唔錯!!同佢玩終於有返反應, 同笑返

己經兩日無乜點笑, 呢家見返佢笑, 真係安心晒喇!!




不過都係咳, 希望大爺快啲好返啦!!