[山系大爺] 親親大自然@龍山

10 JAN 2015

[山系大爺] 親親大自然@龍山

經過12月聖誕節活動, 今日終於得閒去行山喇!!
本身想去馬鞍山, 但公公婆婆話好高,  仲高過上次行大山既一倍
同埋太耐無行, 驚大爺又發作(潔癖), 都係近近地去屋企附近既"龍山" 

目的地: 山上塔既位置

哈哈哈, 今日有大爺爸一齊行!!YEAH!!
一家三口去行山喇~
((大爺爸今個1月全部放星期六或 日,  真係開心死我))

地上執到寶

就係心型既紅葉喇!!

呢條路勁多狗屎, 要專心啲睇路行, 唔係就中地雷喇!!

公公話呢條路兩邊都係草, 啲草仲高過大爺
山路亦比較斜, 可能要爬幾步
叫我地預備定手套俾大爺, 費事介襯手

好喇, 準備好晒, 入叢林喇!!
今日仲有大爺既姑婆同丈公, 今日姑婆既服飾嬴左婆婆喇!!

真係俾我估中, 太耐無行大爺啲潔癖又發作
一路係度厭呢樣厭o個樣, 又唔肯捉住兩邊啲樹枝上同啲石,
又話整污穢對手套=.= 

睇下佢幾厭惡既樣, 呢個樣真係好好笑..hahaha

依個阿旺新髮型媽媽我真係睇唔順眼

但大爺反而好鐘意，仲堅持話係無心法師頭

（佢未睇過呢套劇，只係睇廣告見到）

不過去到中段好快就適應左

終於肯自己爬, 唔怕污穢喇!
我地個個即刻係咁讚佢叻仔, 鼓勵佢~ (係好浮誇地讚WAKAKA)
跟住.....佢.....就開始得戚話唔使拖住佢 ~佢要自己行~

咁咪乖囉！

YEAH!!

上到山我地兩母子通常都係嗌一嗌落山, 哈哈!
~~~~"下面你地好嗎"~~~~~
UM, 當然無人應我地啦..HAHA

為左獎勵大爺, 俾佢騎左一下膞頭!!!

騎左一下就再繼續啦~
就快到個塔啦, 加油!!

啦啦啦~~你地睇我唔到~

嘻嘻!!!

呢啲要爬既又俾佢試下，又得左喎！

好高高啊，呢到望落去見到我地屋企架

大爺幾有成功感

yo!使乜驚啊。

小朋友一見咁多石仔, 就好開心!
呢個大爺係度掉石仔掉得好開心~

佢個動作好想掉過黎~

好啦, 玩左陣再行喇!

仲有一段路先到山頂.!!

大爺真係越戰越勇啊!!

呢個位咁"風箏與風",真係唔好錯過, 拉左大爺爸影下
((大爺爸咪擺啲好娘既pose=.=))

上到山望返落去, 真係零捨心鄺神怡

上到頂, 就坐低食下野休息下先

不過實在太大風, 食完都拿拿淋落返山

大爺真係好愛落山, 每次都同公公跑落山
今次公公陪佢跑一段, 大爺爸又陪佢跑一段
我遠處仲聽到大爺怪笑怪叫咁落山, 真係好搞笑~

我就當然仲係後面慢慢落,
慢慢落我都跣低左落地, 太多碎石, 我對鞋又唔防跣
有幾段太斜, 我索性蹲o係度sir滑梯咁sir落去wakaka
所以我好唔明點解佢地可以跑落山~=.=!!

好快就落到山喇!!!

公公仲話比起上次佢地幾個大人自己行
今次仲行得快左落到黎!!hahaha

大爺落到山仲好興奮, 係咁話好好玩
下次再要去返呢個山行!!XD

今日由11點行到2點就行完
我地行完落返去飲茶, 飲完仲行埋返屋企, 大爺都無叫抱過
返到屋企仲玩到夜晚無瞓過, 真係好堅~
我同大爺爸己經謝晒!!

不過今日呢個天氣好好, 行起黎一啲都唔辛苦
襯未夏天真係要行多啲先得!!
(上次夏天行大山真係差啲中暑)