小小人仔, 大叔口味

今次要講講大爺既飲食

平時最鐘意食白飯, 魚

佢仲可以成條魚自己食清晒~((由細到大都超愛魚))

白飯亦都食到一大碗飯!!!

嫲嫲好錫佢, 餐餐必定有魚, 呢日佢又自己食晒成條魚

仲一路食, 一路好享受既樣話"um..真係好好味啊, yummy yummy, 嫲嫲你整得好好味"

=.=真係浮誇!!

平時屋企肯食:

白飯, 魚, 腸仔, 雞翼, 枝竹, 腐皮, 粟米, 湯, 蕃茄肉碎粥

菜都肯食少少

佢唔係食得少, 佢都食得幾多下

最頭痛係佢乜都唔肯試, 食黎食去都係o個幾樣

我地己經叫佢試左先, 如果唔好食先吐返出黎, 佢連個口都唔肯打開

係咁話"唔食唔食, 我覺得唔好味"

都未試又知唔好味=.='' 真係好勞氣!!!

最古怪既係, 佢口味好大叔

出街食飯, 一食西餐就唔多肯食, 粉類意粉, 通粉, 烏冬掂都唔肯掂 

最鐘意中式野, 依家最愛飲茶, 平時公公嫲嫲湊去完公園成日都話要去飲茶

為既係食啲大叔既盅頭飯, 同燒肉飯 ((暈)) 

呢個魚仔肉餅飯係佢最愛

啲大叔飲茶嘆報紙,大爺就飲茶嘆玩具車wakakaka

依日我地一家三口第一次自己去飲茶XDDD

飲茶除左馬拉糕同雞扎入面舊火腿外

呢啲點心佢掂都唔會掂

((但佢平時三文治火腿佢又唔食架喎))

口味呢啲野真係估佢唔到

近排鐘意食乳鴿, 燒鴨, 蟹籽壽司, 紫菜包飯

吉吉家牛肉飯又鐘意食,平時俾啲牛肉佢又唔食

出面食吉列豬扒佢又食, 煎豬扒又唔食

 煎蛋炒蛋唔食, 蒸水蛋就食..

真係無佢辦法!!!

會唔會再大啲先肯試新野???食多啲種類呢???