[山系大爺] 酷熱天氣下行山@龍山

07 AUG 2016

[山系大爺] 酷熱天氣下行山@龍山

之前一日游完水, 呢日公公一早就打黎叫大爺去行山

我都估大爺會話, 我去佢先去架喇!!!佢實~~~在~~~~太~~~愛~~~我!!

 但今日實在太熱, 酷熱天氣, 成3x度, 我都考慮左一陣

但大爺又想我一齊去, 唯有頂硬上啦~~~ 我覺得公公想特訓我多啲囉~

今次行屋企附近既龍山, 所以好快搞掂就出門口

 會合埋公公, 婆婆, 大爺既姑婆, 丈公就出發喇!!

我地要行大段石屎路上去先會入叢林

我發覺大爺唔鐘意行呢啲平坦既石屎路, 次次行襯都係度嗌熱嗌攰!!

不過今日真係好熱, 我都頂唔順~~

大爺仲係入叢林既入口度話要返轉頭落山返屋企~

o係我地鼓勵之下, 佢都肯繼續行~

但一入到叢林佢又無嗌熱嗌攰架喎!!! 仲成個人生猛晒~

證明佢真係好鐘意行叢林,仲叫我跟住佢=.=!!

我實在熱到無心情理大爺 , 所以交佢俾公公婆婆 

佢跟住我應該會有危險..wakakaka 

公, 婆, 孫仲有閒情睇風景

一路行我覺得好似焗緊桑拿咁

 咩事佢陰陰咀笑??

好認真整走啲草開路呇

實在太熱啦, 休息下先

呢個時候姑婆話頂唔順, 沿路落返山, 我緊係舉腳讚成啦~~

但大爺聽到死話要繼續行, 唔返轉頭, 真係玩野!!

明明初初係咁話要返屋企~~

繼我地了解之後, 原來佢記得上次同大爺爸黎呢度行

落山條路佢同大爺爸係跑落山, 佢話好好玩, 要行返去o個度跑落山

我地聽完之後, 個個都話無力同佢跑落山架~

佢先肯同我地沿路落返山XD

差不多行返出叢林, 經過條溪澗, 我地諗住濕下條毛巾

呢個大爺就話要玩陣先~~~玩陣玩陣, 就玩成咁~

實在太熱, 見佢玩得咁開心咁爽, 我都由佢

但我事前己經話佢知, 無帶衫俾佢換, 整濕左就濕住行返屋企架啦~

um....佢竟然答我"好啊"

佢係由頭濕到落腳既

公公無佢咁癲, 只係洗埋頭啫..哈哈哈!!

玩完水, 睇下佢個樣幾咁爽!!仲話好開心, 下次再玩過~~~

就係咁行落山返屋企喇!!

********************************************************************************************

返到屋企搭lift上樓, 有個大叔一齊入lift

個大叔撩大爺傾計, :"小朋友, 去邊玩黎啊???"

大爺: 頭先去行山黎

大叔望住我: 唉~好心你啦, 天氣咁熱仲帶個小朋友去行山

((佢啲語氣係勁衰,  好似我虐待大爺咁啲語氣))

 聽到呢句我火都黎, 佢仲繼續講緊~~咁辛苦為乜...又乜乜乜乜..

好彩我地住低層好快到, 唔使再聽佢講落去

最嬲係佢o個句"好心你啦"

乜事先?? 乜叫好心你啦, 我做錯啲乜啊??咁熱唔可以行山咩?
我咁熱都陪個仔行山, 仲要聽到呢個大叔話我, 真係火都黎....

我覺得大爺行山, 佢好開心, 亦都好enjoy喎, 仲搵到行山既樂趣!
我無虐待佢囉.......反而佢虐待我多啲囉..XDDDDDD
行山有益身心, 強身健體, 仲可以鍛鍊大爺既毅力, 所以呢個大叔講既野我唔會理~
不過佢實在太多事幹!!!

****************************************************************************************

沖完涼, 大爺既同學仔問一唔一齊返學校玩教會搞既嘉年華

見大爺唔願瞓晏覺就同佢返去玩下~

玩晒六個遊戲就可以拎一份禮物!!

同埋今日有抽奬環節,一向都無抽奬運既我無諗住放張抽奬卷落去,諗住都唔會抽中架啦~

不過諗諗下我無抽奬運啫, 可能大爺有呢~~

o係仲有最後5分鐘截止時我就走去放

點知竟然抽中大爺, 大爺好開心聽到自己名, 即刻衝去領奬