[[BIG YEAH K1]] 9月的校園生活

大爺剛過去9月既校園生活

可以話係相當順利，亦都無喊過

頭一星期，老師話大爺好乖肯坐定定，跟得到老師

o係學校website新生適應日相簿搵到大爺既2張相

難得正經笑既大爺, 平時我都影唔到呢個樣XD

爬繩網, 好專心~

8,9月份生日會
生日會著便服+ 生日袋

大爺將個生日袋咩到好似阿豬媽既買餸袋咁=.=!!

生日會個個同學仔都會有一份小禮物

有時大爺既姑媽返嫲嫲度瞓，就會負責湊大爺返學放學

姑媽好好，成日影相俾我睇

平時門口洗完手就係呢度排隊上班房

大爺排1號隊，等齊幾個老師就帶佢地搭lift

有次隔離2號隊夠晒人，老師見佢一個就順便帶佢走

點知佢縮手唔俾老師拖，仲話：我係排呢度先岩架！

老師就話：唔係啊, 夠晒人我地就可以走架啦~

大爺就死死地氣跟老師走XDD

((好固執))

有日媽媽偷懶無返工

送大爺返學放學，佢勁開心！

有日佢地班玩整爆谷, 整完仲有得品嚐下添~

呢間學校成日都好多講座同活動俾家長參加
平日個啲我己經無參加, 星期六我就一定參加 (9月己經返左學校3次)
今日聽完閱讀講座後, 就有幼兒班新生會, 班主任會同我地講返學流程
望下大爺坐既位

又見到全部同學既畫貼晒係壁怖板度
搵到大爺個幅, 有啲意外, 竟然唔係亂咁畫
係又有線, 又有大圈又有細圈架喎!!
返屋企問佢畫乜? 佢話中間啲線係1字
大圈出面個啲係頭髮
完全唔知佢想畫乜?哈哈哈哈~~

間唔中書包又會有啲大爺上堂畫既畫拎返黎
全部都好抽象~XP

今次終於有得同黎老師傾下計, 問下大爺平時情況
估唔到大爺平時表現都唔錯bor
老師話大爺好乖仔, 好叻有小聰明, 好識睇老師想佢做啲乜
上次仲送左份小禮物俾大爺, 全班得3個同學有 :D
不過就話大爺, 公公黎接佢就好開心, 嫲嫲黎接佢就當堂唔同晒~
上次嫲嫲都話大爺見到佢即刻話:做乜係你黎接我既~
嫲嫲應該好傷心, 衰仔包啊~

中秋節仲有花燈會,猜燈迷, 猜完個燈籠就送俾你架啦!

上堂自制既燈籠

中秋節拎左大爺學校猜燈迷返黎既燈籠落街玩

9月中己經開始有功課
星期一至四, 每日一頁/  星期五,做2-3頁
都係好簡單既, 連線, 配對, 填色
大爺都好鐘意做功課, 唔使三催四請 ((希望第時都係咁啦))

每個月都有個小小既表現報告, 老師會填係手冊度俾家長睇
對於第一個月黎講, 表現算唔錯啦, 大爺繼續努力啦!!!
而家長亦都要填家庭報告俾老師睇
呢樣好正, 我呢家成日都同大爺講, 如果唔自己食飯
我就填落手冊度俾黎老師知, 所以大爺近排自己食飯好左啲啦~嘿嘿嘿~

我發現佢真係好聽黎老師話, 呢家佢一唔乖我就扮打俾黎老師
佢就即刻乖乖聽話返!!!唔知呢個方法work幾耐呢??